【#多謝Shell】震撼700萬人的冠名內幕

由細到大，你睇電視時，廣告位等如廁所位；某某品牌冠名贊助節目？車，關我咩事。不過，油公司Shell竟然無懼＿＿＿（嗯…無懼咩？咩都好啦，總之就無懼啦），走去冠名贊助《毛記電視分獎典禮》，一時間被網民、廢青封為「最有Guts品牌」，典禮舉行當日，Facebook「#多謝Shell」Hashtag多到水浸。
促成今次與《毛記電視》合作嘅幕後其中一位功臣，香港蜆殼零售業務部市場推廣經理曾穎思（Vanessa），聽到「夠Guts」呢個形容時，佢當堂嚇一跳，然後真係笑，「其實我哋真係唔明點解啲人話件事有Guts。」Vanessa解釋，公司一直都會搵唔同平台做推廣，今次合作，對公司來講的確係新嘗試，至於「#多謝Shell」Hashtag嘅出現，係完全由網民自發，公司對《毛記》嘅唯一要求，就係開心同埋Fun，至於贊助費幾多，佢就冇透露。
當日《毛記》主播之一崔建芒（Amango）喺台上，講到今次搵贊助嘅辛酸史。佢話曾經有唔少品牌表示有興趣，但每每去到高層，個Proposal都被打回頭，「所以喺最後關頭　竟然真係有一個客戶，一個Client，竟然Kai到最後最後最後最後關頭，落實冠名贊助佢哋。」
聽到呢度，你一定以為Vanessa要花盡九隻牛、兩隻虎之力，又越過高山又越過谷，去說服高層同高高層科水贊助。少年，你想得太複雜了，事實係兩公司一拍即合。
Vanessa憶述，Shell都係11月先收到《毛記》個Proposal。佢自己本身，都睇過《100毛》同《毛記》幫其他品牌拍嘅廣告，覺得好過癮。於是佢就好有效率地，向高層同高高層Sell橋。問題嚟啦，你有睇開《毛記》就話知佢乜帶乜路啫，但面對冇睇開嘅人，理論上係好難用三言兩語解釋到《毛記》係咩。提到呢個問題，Vanessa表示，其實唔難：「歡樂今宵囉！」精準！通透！果然一句就明晒。
之後呢間千幾億美金市值嘅油公司Shell香港高層，就親自走上呢間自稱係電視台嘅電視台總壇開會。Vanessa就話，「其實我都唔明，大家做咩成日話（林日曦）黑面……佢其實只係比較嚴肅啲，傾落幾好傾。」結果一次會面，兩間公司一拍即合，《分獎典禮》終於有贊助商！
Vanessa代表公司企上分獎台時，心情好似好激動，仲疑似眼泛淚光！佢本人就話，今次完成呢個Project好感動，因為兩個月以來，佢同佢嘅團隊，都非常投入今次活動宣傳工作，年尾冇得拎假，齊齊趕工，更加有同事做完手術，放病假都要做嘢。「做到呢個Project，我哋真係好興奮咗好耐。」由Vanessa表情睇得出，佢哋應該係堅開心。
今次Shell成為贊助，得到唔少掌聲（當然亦有人挖返公司破壞生態嘅瘡疤）。至於成個《分獎典禮》，佔當晚香港網上討論參與者互動90%，有138萬人討論，吸80萬Like。今次兩間公司嘅合作，可以話係香港Marketing史上，其中一個網上營銷最成功案例之一，應該係，除非唔係。
記者：倪敏慧　攝影：陳家文
掌握財經生活資訊，即Like「蘋果ATM」fb專頁啦！