【港女乜乜乜】不拜金package 政見不同即飛

「我o依家就話畀劉鳴煒知，我EQ無問題！」在港台節目《我係乜乜乜》中表示「政見不同即刻分手」的Heather（26歲）解釋，「支持和反對梁振英政府呢兩種唔同政見，已經係是非黑白嘅問題，去到價值觀嘅層面！」當男神選舉的焦點落在拜金和轉軚港女，你又有否留意當中一位，為了捍衛政見而分手的另類港女？
記者：鄒倩婷、梁智威　攝影：馮峰、陳家文
到今天，Heather仍然企硬支持「游學修派」，她說不能夠接受劉鳴煒「太離地」，但笑言其實她想選男主持麥嘉緯為男神，「男主持靚仔好多，聽佢問問題會覺得好過癮，有啲陰濕，陰濕得嚟有智慧嘅。」
最近「package」一字成為話題，Heather談到自己的package，坦言自己「惡哽」，「好聽啲講就係熱血，唔好聽咁講就係廢青，粗魯又鍾意講粗口，個人仲好硬頸！」但是Heather有別於一般「港女」，她不追求名牌，只求「有瓦遮頭」，有能力儲錢去旅行見識世界，已經心滿意足。
Heather是一位自由工作者，坦言賺錢不多，月入約一萬多，但活得開心，至少能夠平衡生存和生活，「錢係重要，但是錢唔係一個核心嘅價值觀，我寧願多啲時間做自己想做嘅嘢，好似去關心社區，支持小店，仲有意義！」
為何要支持小店？因為Heather在北區的公屋長大，她帶着記者走過上水的大型商場，憤指連大型連鎖食肆都被變成藥房和化妝品店，「上水人就嚟連飯都無得食！」再走往舊墟，行人路和馬路都充斥着一箱箱貨物，結果人和車要爭路。Heather眼看此地每日被水貨客入侵，心痛不已。
而畢業於浸大新聞系的Heather亦非常關心時事、政事，可謂原力醒覺了的貼地港女，過往她參與過反對東北發展、罷課、雨傘運動等，這點熱血或許成為男士眼中的優點，她的大學同學阿妹大爆，大學時期同學都稱呼她為「娘娘」。Heather立即自嘲是「地獄觀世音」，歡迎大家加入她的兵團。
Heather和阿妹在大學一年級認識，當年她們一起玩舞台劇。阿妹指每提到有關政治方面的事，都自不然會想起Heather：「好似佔中嗰期，嗰度嗰度有冇危險呀或者咩，我哋都第一時間會諗起佢同問佢。」
回想起「覺醒」一刻，Heather指是源自東北發展前期撥款一事，「當時吳亮星呢條...人渣想粗暴剪布，啲人好激動想衝入立法會，嗰次係人生第一次見到防暴警察出現。」Heather直言當時很震驚，質疑防暴警察為何是對付香港人而非恐佈份子。自此，她知道香港正在改變，香港人不能再沉默。
在參與社運的過程中，令Heather最不開心的是覺得自己是香港人中的異類，「大部份香港人係甘願做港豬，港豬係開心過正常人，唔開心嘅事對於佢哋嚟講，係無發生過。」Heather坦言會感到無力，「做人唔開心都唔知為乜，不如試吓離地，離地一個禮拜係對生活無影響，唔睇新聞咪唔會成日嬲。」但Heather嘆息，可能因為身處北區，出街便面對水貨客和藥房，很難完全離地。
「就算我幾愛呢個地方都好，原來呢個地方根本唔愛我。」在香港土生土長，落力保衛這個地方的文化及核心價值，可惜換來的只有失望。Heather指香港人的價值是要錢，這個所謂的「價值」曾經也令她動搖過，但經思考後亦無阻她一直發聲、反思，始終她都不能放棄自己所愛的香港。
「如果香港變唔到我心目中嘅package，呢一刻我仍然會選擇留低，愛一個地方唔同愛一個人，人唔好你可以走，但是香港得一個，係我嘅屋企，我唔想因為佢有問題我就走。」「港女」可以有承擔，而經常嫌棄「港女」的大家又可以為保衛家園去到幾盡呢？